Nta wundi muhango wihariye wo kurutaha wabayeho. Abacitse ku icumu, uko ubushobozi bwagiye buboneka, bubakiye iyo mva rusange uko imeze ubu; nyuma ku nkunga ya Rwanda Faom ya Makuza Bertin rwarasakawe ruranazitirwa. Hashyinguyemo abantu 6711. Umuhango wo kubibuka uba buri tariki ya 10 mata buri mwaka. Iyo tariki ya 10 yibutsa igitero cy’abasirikare n’interahamwe baje kwica abahungiye mu Kiliziya.

II . Amateka magufi y’aho urwibutso ruri.

Aka gace kitwaga mbere y’Ubwigenge Ubwanacyambwe, hagatwarwa na Shefu Mungarure Pierre; kagizwe n’abantu bitwaga Abashakamba, umutwe w’ingabo uhuriwemo n’Abahutu n’Abatutsi n’Abatwa nkuko byari bimeze mu Rwanda hose mu mitwe y’ingabo. Wayoborwaga na Ntwarabakiga. Guhurira mu mutwe w’ingabo umwe byaremaga ubucuti bukomeye bw’abawugize, ninako byari bimeze mu Bwanacyambwe, Abahutu n’Abatutsi bari babanye neza mbere y’uko Ababirigi n’Abamisiyoneri babyutsa amashyaka ateranya ubwo bwoko bwombi, kuko abatwa batabitayeho. Uwo mubano mwiza warakomeje kugera byibura muri 1961.

Igikorwa cy’ivangura n’urwango cyatangijwe no gutwikira abatutsi, inka zabo ziraribwa, barameneshwa, abasigaye barafungwa babuzwa amahwemo.

Ibyo byarabaye no mu Bwanacyambwe.

Abanyagahanga by’umwihariko bavuga ko PARMEHUTU yaje iwabo gukora ibyo bikorwa by’urugomo iturutse i Rubungo; aho i Rubungo hakaba hari harimukiye abantu baturutse mu Ruhengeri agace k’u Bukonya, hari muri Komini Gatonde. Abo bimukira rero nibo batije umurindi abari basanzwe i Rubungo bamaze kuyitwika, Komini Kicukiro bituranye, yategekwaga na Burugumestri Buregeya Vianney wari umurwanshyaka wa Parmehutu, nayo barayitwika.

Nubwo Kicukiro, Komini Gahanga yabarirwagamo nayo yatwitswe, abo ku musozi wa Gahanga ntibahise babyitabira byabaye ngombwa ko Burugumestri Buregeya yitabaza abandi bayoboke ba Parmehutu, kugirango nabo batangire gukora nkuko babyitaga. Ashaka uwitwa Mbonyi ukomoka mu bwoko bw’Abazigaba batuye ku gasozi ka Nunga i Gahanga n’abo ku kandi gasozi biteganye ka Karembure, Mbonyi ayobora ibitero byo gutwikira abatutsi.

Imiryango y’abahutu b’Abazigaba n’Abagesera yari ikomeye cyane hariya i Gahanga, ni nayo yatangije ibikorwa byibasiye abatutsi muri icyo gihe cya 1960-1961.

Ubukungu bw’aka gace bwari bugizwe ahanini n’ubworozi n’ubuhinzi.

III . Ibikorwa by’urugomo n’ubwicanyi: 1959-1962

Burgumestri Buregeya Vianney yabonye imbaraga muri ya miryango y’abahutu ikomeye aba ariho aremera amacakubiri.

Imiryango y’Abatutsi, igizwe n’Abasinga n’Abacyaba n’andi moko y’abatutsi atari yiganje cyane nk’abo babanza, bishyize hamwe bihagararaho bahangana n’ibitero by’abayoboke ba Parmehutu ndetse barabanesha babasubiza iwabo. Ubwo ni muri 1960-1961. Ingabo z’Ababirigi zitwaga Kamina ziyobowe na Kolonel BEM Guy Logiest, zatabaye ibitero byagabwe n’abahutu zimisha amasasu mu batutsi baratatana barahunga ndetse bacika n’intege kuko ibirwanisho byabo bya gakondo ntibyashoboraga guhangana n’imbunda.

Abatutsi bahungiye mu Misiyoni Sainte Famille i Kigali aho bitaga « mu mikwege”, abandi bafata inzira ya Burundi, Uganda, na Tanzaniya. Bamaze kunamura icumu, Abatutsi baciye umuganda barubaka barongera babana n’abahutu batavuga ngo batavaho bakoma rutenderi.

Ibisigisigi by’Abazigaba n’Abagesera b’Abahutu byarigaragaje cyane muri Jenoside yakorewe Abatutsi mu Rwanda muri 1994. Ababakomokaho n’ubu batuye mu Akagari ka Karembure mu Umudugudu wa Mubuga.

Abatutsi baratwikiwe, barameneshwa, babaho nabi mu buhungiro mu “mikwege” kuri Ste Famille, bahungira ishyanga mu bihugu batazi bidahuje umuco n’u Rwanda, babaho mu buzima bugoye mu mahanga, banyagwa imitungo yabo itimukanwa: amasambu, inka n’ibindi; Ntibyatinze muri 1963 aba nyagahanga bakorerwa Jenoside yiswe ityo bwa mbere n’abanditsi n’abashakashatsi muri 1963.

IV . Mu gihe cya Repubulika ya mbere: Nyakanga 1962- Nyakanga 1973.

Grégoire Kayibanda niwe wari Prezida wa Repubulika. Mu gihe cy’ubutegetsi bwe, inyito zakoreshwaga mu nzego z’ubutegetsi zari: Umurenge, Komini, Prefegitura. Aho urwibutso ruherereye hari mu murenge wa Gahanga, Komini Kicukiro (muri 1966 yahindutse Komini Kanombe), Prefegitura ya Kigali.

Muri 1963, ubwo Inyenzi zateraga zitutse i Burundi zikagarukira ku kiraro cya Kanzenze, aho Gahanga ihana imbibe n’u Bugesera, abahatuye bagize akaga gakomeye cyane.

Inyenzi zimaze gutsindwa, Abatutsi b’i Gahanga barishwe by’umwihariko ab’igitsina gabo kuko abagabo n’abasore hasigaye ngerere. Aho kimwe n’ibyabereye mu Bufundu bwa Gikongoro icyo gihe, byiswe Jenoside, kandi niyo; kuko yari yujuje ibyangombwa biteganywa n’amasezerano y’Umuryango w’Abibumbye yo kuwa 9 Ukuboza 1948 avuga icyaha cya Jenoside.

Berchmans Rwangombwa wari uriho icyo gihe, atanga ubuhamya ko harokotse abagore n’abana bacye, Gahanga isigara ari iya abapfakazi; nawe ubwe ngo n’uko icyamurokoye ni uko atari i Gahanga yari amaze igihe gito yimukiye ku mu Umumena i Nyamirambo.

Ababigizemo uruhare ni ya miryango y’Abazigaba n’ Abagesera bafatanije n’abasirikare, urwango rwarakomeje, abana bakura bazi ababiciye ababyeyi, nta n’umuhango wo kwiyunga wabaye, ku buryo ngo muri 1994 batatunguwe cyane, bari bazi  ko igihe icyo aricyo cyose bazicwa urw’ababyeyi babo. Baca umugani mu Kirundi ngo “Ijisho ry’umwansi ryama rikureba igitsure”. N’abo baturanyi babo kandi ntibatinye gukora insubiracyaha. Icyaha kidahanwe kirasubira.

Imibanire y’abatuye Gahanga yaranzwe n’ubwishishane bukomeye, n’urwango rwakorerwaga abatutsi, kuko kuva ku gitero cy’Inyenzi kugera muri 1973, imitungo y’abatutsi barayinyazwe n’imfubyi zacitse ku icumu icyo gihe zisigara zica incuro. Birari Jean Damascène wabaye Prefet wa Kigali yatanze amasambu y’abatutsi, azana abahutu baturutse:i Ruri, Komini Musasa, Rushashi na Mbogo abatuza i Gahanga. Nawe ubwe akomoka i Rwahi muri Shyorongi, ayo masambu bahise bayakata mo ibyiswe paysannat.

Birari J.D. yaje kugororerwa kuba Minisitiri w’ubutegetsi bw’Igihugu (Intérieur).

Bamwe mu bakomoka i Gahanga bagerageje gucuruza, ntibari guhinga cyangwa kwororera mu masambu batakigira; ucuruza nawe agahora yigura inyungu akayigabana n’abamunyaze cyangwa bamuhekuye.

Barakumiriwe mu mashuri no mu kazi ka Leta, bagafungwa buri gihe ibitero by’Inyenzi babyikanze haba mu Bugesera n’ahandi kure ya Gahanga nko muri Nshili kuko naho Inyenzi zahanyuze.